Get the latest news at
your fingertips!
Download our app now
LIVE TV
Search
നടന്‍ ഷൈന്‍ ടോം ചാക്കോയ്ക്കെതിരെ നടി വിന്‍ സി അലോഷ്യസ് പരാതി നൽകിയ സംഭവത്തിൽ പ്രതികരണവുമായി നടി സ്വാസിക. വിൻ സിക്കുണ്ടായ അനുഭവം ഇനി ആര്‍ക്കും ഉണ്ടാകാൻ പാടില്ലെന്നും എല്ലാ സംഘടനകളും വിൻ സിക്കൊപ്പം നിൽക്കണം എന്നും സ്വാസിക പറഞ്ഞു. ഷൈനിനൊപ്പം ഒരുമിച്ച് അഭിനയിച്ചപ്പോൾ തനിക്ക് മോശമായ അനുഭവം ഒന്നും ഉണ്ടായിട്ടില്ല. കൃത്യ സമയത്ത് ഷൈൻ ഷൂട്ടിന് വരുകയും ഞങ്ങളോട് എല്ലാവരോടും സഹകരിക്കുകയും ചെയ്തിരുന്നു. പക്ഷെ എല്ലായിടത്തും ഒരാളുടെ പെരുമാറ്റം എങ്ങനെയാണെന്ന് പറയാൻ പറ്റില്ലെന്നും സ്വാസിക അഭിപ്രായപ്പെട്ടു. വിൻ സിയുടെ പരാതി സത്യസന്ധമാണെന്ന് താൻ വിശ്വസിക്കുന്നെന്നും റിപ്പോർട്ടറിനോട് നടി പറഞ്ഞു.
'വിൻ സിക്കൊപ്പം എല്ലാ സംഘടനകളും നിൽക്കണം മറ്റു കാര്യങ്ങൾക്ക് താമസം വരുന്ന പോലെ ഈ കാര്യത്തിൽ ഒരു താമസം വരാതെ എത്രയും പെട്ടെന്ന് നടപടി എടുക്കണം. വിൻ സിക്കുണ്ടായ അനുഭവം ഇനി ഉണ്ടാകാൻ പാടില്ല. വ്യക്തിപരമായി എനിക്ക് ബുദ്ധിമുട്ടുകൾ ഉണ്ടായിട്ടില്ല. മുൻപും പല ആൾക്കാരും ഈ വിഷയത്തിൽ സംസാരിച്ചിട്ടുണ്ട് പക്ഷെ അന്നൊന്നും ആരാണ് എന്താണ് എന്നുള്ള പേരുകൾ പുറത്തുവന്നിട്ടില്ല. ഇപ്പോൾ ആ നടന്റെ പേര് പറഞ്ഞു ഒരു പരാതിക്കാരി മുന്നോട്ട് വരുമ്പോൾ അതിനു കൃത്യമായ നടപടി എടുക്കണം'.
'ഞാൻ ഷൈനിനൊപ്പം ഒരുമിച്ച് അഭിനയിച്ചപ്പോൾ എനിക്ക് മോശമായ അനുഭവം ഒന്നും ഉണ്ടായിട്ടില്ല. കമൽ സാറിന്റെ സിനിമയായിരുന്നു അത്. കമൽ സാർ ഷൈനിന്റെ ഗുരുതുല്യൻ ആയതിനാൽ ആകാം അത്തരം സംഭവങ്ങൾ ഒന്നും അരങ്ങേറിയിട്ടില്ല. ആ സെറ്റിൽ ഞാനും ഷൈൻ ടോം ചാക്കോയും 35 ദിവസം ഒരുമിച്ചുണ്ടായിരുന്നു. അന്ന് കൃത്യ സമയത്ത് ഷൈൻ ഷൂട്ടിന് വരുകയും ഞങ്ങളോട് എല്ലാവരോടും സഹകരിക്കുകയും ചെയ്തിരുന്നു. സെറ്റിൽ ആർക്കെങ്കിലും ബുദ്ധിമുട്ടുകൾ ഉണ്ടാകുകയോ ഷൂട്ടിംഗ് നിർത്തിവെക്കേണ്ട അവസ്ഥയോ ഉണ്ടായിട്ടില്ല. പക്ഷെ എല്ലായിടത്തും ഒരാളുടെ പെരുമാറ്റം എങ്ങനെയാണെന്ന് പറയാൻ പറ്റില്ലലോ. വെറുതെ ഒരു തമാശക്ക് ഒരു പരാതി പറയേണ്ട കാര്യം വിൻ സിക്കില്ല. അതുകൊണ്ട് ആ പരാതി സത്യസന്ധമാണെന്ന് ഞാൻ വിശ്വസിക്കുന്നു. വളരെ സീരിയസ് ആയ നടപടികൾ എടുത്താൽ മാത്രമേ സെറ്റിൽ ഇനി ഒരു പേടി ഉണ്ടാവുകയുള്ളൂ', സ്വാസിക പറഞ്ഞു.
ലഹരി ഉപയോഗിക്കുന്നവര്‍ക്കൊപ്പം ഇനി സിനിമ ചെയ്യില്ലെന്നും ലഹരി ഉപയോഗിച്ച ഒരു നടനില്‍ നിന്നും മോശം അനുഭവം ഉണ്ടായതിനാലാണ് തീരുമാനമെന്നുമുള്ള വിന്‍ സിയുടെ വെളിപ്പെടുത്തല്‍ ചര്‍ച്ചയായിരുന്നു. അന്ന് നടന്റെ പേര് വിൻ സി വെളിപ്പെടുത്തിയിരുന്നില്ല. പിന്നാലെ ഇപ്പോൾ ഷൈൻ ടോം ചാക്കോയ്ക്കെതിരെ വിന്‍ സി ഫിലിം ചേംബറിന് പരാതി നൽകുകയായിരുന്നു. 'സൂത്രവാക്യം' എന്ന സിനിമയുടെ ലൊക്കേഷനില്‍ വെച്ച് ഷെെൻ ടോം ചാക്കോയില്‍ നിന്നും മോശം അനുഭവം നേരിടേണ്ടി വന്നുവെന്ന് ചൂണ്ടിക്കാട്ടിയാണ് വിൻ സി ഫിലിം ചേംബറിന് പരാതി നൽകിയത്. സിനിമയുടെ ആഭ്യന്തര പരാതി കമ്മിറ്റിക്കും പരാതി നല്‍കിയിട്ടുണ്ട്.
Content Highlights: Swasika comments on Vincy Aloshious complaint against Shine Tom Chacko
